‘होस्टेल रिटर्न्स’ बैशाख २५ गते दर्शकमाझ आउने

पोस्टको काम सुरु भएसँगै सफल सिनेमा ‘होस्टेल’ को सिक्वेल ‘होस्टेल रिटर्न्स’को रिलिज मिति घोषणा गारिएको छ । निर्माण कम्पनि ‘दुर्गिस फिल्मस् ले सिनेमालाई २०७२ सालको बैशाख २५ गते (मे ८ तारिख)का दिन देशब्यापी प्रदर्शनमा ल्याउने घोषणा गरेको हो ।

अहिले सुटिङ सकिएसँगै पोष्ट प्रोडक्सनमा रहेको यो सिनेमाले प्रचारको कार्यक्रमलाई भने अहिलेदेखी नै सुरु गर्ने बताएको छ । निर्माता सुनिल रावलले सिनेमालाई नयाँ प्रचार रणनीतिअनुसार दर्शकमाझ लैजाने तयारी भैरहेको बताए । सुरज भुषाल निर्देशित सिनेमाले छात्रावासको जीवनशैली, बसोबास गर्ने विद्यार्थीबीचको मतमतान्तरको कथा पेश गर्छ । ‘हामी प्लस टु परिक्षा सकिएको सातापछि फिल्मलाई हलमा लैजाने पूर्ण तयारीमा छौं’ मिति घोषणाबारे निर्माता रावलले भनेका छन् ।

सिनेमामा सुशिल श्रेष्ठ, नजिर हुसेन, सुशिल सिटौला, अभय बराल, शशी श्रेष्ठ, स्वस्तीमा खड्का, सुदाम सिके, प्रदीप चौधरी, रोयदीप श्रेष्ठ, इभम जोशी, निर्मल शर्मा, दीया मास्के र निर्माता रावलको अभिनय रहेको छ । ‘होस्टेल रिटर्न्स’लाई हरि हुमागाइँले खिचेका हुन् भने संगीत स्वप्नील आचार्यको छ ।

यसअघि सायद र होस्टेल निर्माण गरेको दुर्गिश फिल्मसको यो तेस्रो प्रोजेक्ट हो । ‘सबै कलाकारले एकदमै महत्वपूर्ण र आकर्षक अभिनय गरेका छन्’ रावलले भने, ‘पब्लिसिटी र उत्कृष्ट फिल्म बनाउनका लागि हामीले कुनै कसर बाँकी राखेका छैनौं ।’ यो सिनेमामा अष्ट महर्जनको द्वन्द्व समावेश भने नृत्य निर्देशन गोविन्द राईले गरेका छन् ।